Kaamatan

Tadau Kaamatan toi ko’ Tadau kokotuan. Sundung po dilo, istilah nopo Tadau kaamatan id suang do boros Kadazan nga Magavau. Mantad dilo, ogumu o istilah do o karamayan diti nga miiso ii ngawi o komoyon. Tadau kaamatan, Tadau Kokotuan, toi ko’ Magavau nopo nga iso karamayan tinaru Kadazandusun ii nokosiliu do kointutunan kumaa tinaru Kadazandusun id Sabah. Tadau kaamatan nopo diti nga ii ramayon do tulun Kadazandusun do tikid wulan mikat do pointiitikid toun. Tudu nopo do pohoroon o tadau Kaamatan do tikid toun nga montok no do monongkotoluod om mogounsikou kumaa do kinorohingan. Tadau kaamatan diti nga kitudu nogi do mamantang do sunduan do parai ii nointutunan do Bambarayon.

Suusuai po kawagu, karamayan diti nga popondom nogi kumaa tinaru Kadazandusun kokomoi do nontodonon do tinaru om nogi kumaa do kinorohingan tu nakaanu pinopolubuk do tanak dau pinungaranan do Huminodun ii nokolubuk sabab monguhup do tulun kampung i nowiaan no do taakanon ontok di pogulu ii. Huminodun nopo nga songulun tondu tolundus, tanak Kinorohingan om tina dau i Suminundu. Isido nopo nga tanak do koginawaan, tonsi dau nadadi do parai, takanon koposion tokou om suai ko iri ogumu po takanon do suai nadadi mantad tinan dau. Pason di Huminodun pogulu maso do luminubu nga sorohon oku no dikoyu om kada oku lihuai. Li nodi karamayan tadau kaamatan kumaa do kounsikahan om kasarahan di Huminodun, tadau do awasi ginawo, olundus om obingupus.

Ii nopo nga piboiyaan do manari do Sumazau. Sayau nopo dilo nga kohompit do tondu om kusai miampai do momoguno do rasuk tradisional diolo i nopo nga roitan do tinandai. Suai dilo, sayau nopo dilo nga kohompit nogi do kopongunoon do tagung maamaso do manari do sumazau. Suai ko’ mantad manari do sumazau, haro nogi do piboiyaan do sugandoi, unduk ngadau, sundait, mangagung, manangon, monompoton, om ogumu po suai ii pohoroon ontok tadau karamayan diti. Oinsanan piboiyaan dilo nga polombuson do id suang boros Kadazandusun om kohompit do oinsanan tulun Kadazandusun i ongokoro om i angagayo no. Mantad dilo, elemen toponsol nopo momoogun Kadazandusun id suang aspek karamayan nopo nga Tadau Kaamatan. Id nonggo, gisom baino nga elemen toponsol dilo kaakal po do potilombuson gisom do baino.

    Id kampungku nopo hilo id Kampung Randangong lama nga mamaramay nogi tadau kaamatan. Momonsoi do abaabayan miagal ko sugandoi molohing toi ko danzandak, unduk ngadau danzanak om ingga nogi unduk ngadau montok komolohingan, sumazau dasom mamalu gong, abaabayan do sukaneka montok piuhupan toinsanan tulun kampung. Ogumu oh taakanon tradisional miagal ko bosou, pinarasakan, tuhau om tiinumaan miagal ko tapai, lihing, waig toomis do pinosodia montok karamayan dii. Suai ko li, haro nogi portandingan do momonsoi tinunturu. Montok 31 mikat, kolimpupuson do kaamatan, isai kamanang om kaanu hodiah, miagal nogi timpu kaamatan dii nakatabil gisom do baino om montok timpu dumontol.